Dinthar FC-in a hnuai lam tlansan zel – Rooney Opa

Estimated read time 3 min read

dinthar-fc-2-1-zo-unitedMizoram Premier League Round 9 inkhel hmasa berah Dinthar FC chuan 2-1 in Zo United FC an hneh. Lammuala inkhelhah hian Dinthar tan Michael Lalremruata chuan goal hmasa ber thunin Zo United tan H. Malsawmtluanga’n a sut a, hun rei tak 1-1 ni mah se Balogun Hammed-a’n minute 83-naah Dinthar chakna goal a khung.

November 3, Ningani tlai inkhelah hian Dinthar tana chakna goal khungtu Nigerian defender Hammed chu man of the match atan thlan a ni.

Table mawngphah inkhel
Inkhelh hma hian Zo United hian point sarih hmuin a mawngphahah an awm a, Dinthar hian point riat hmuin pasarihna an ni bawk. Table a a mawngphah pahnih inkhel hi besei ang ngeiin boruak a tang a, chak mamawh ve ve inkhel a nih avangin team pahnihte an khelh danah chak an duh tih a chiang hle.

Zo United lam hian ball an chang tamin game pawh an thunun a, chance tha pawh nei hmasa zawkin minute 13 lekah Mala freekick tha zet chu Dinthar goalkeeper Joseph Lalruatfela chuan tha zeta lo dangin mipui thawm a tha ham ham hle.

Dinthar hian nawr let vein an player lei thar Cho Tshering Lepcha chuan mual dinglamah ball a khalh phei a, box chhungah tha taka vawrhin Zo United goalkeeper chuan ben chhuah tumin pan mah se Michael-a’n nangching hmasa zawkin goal ruakah a tauh lut.

Si phur zawk Zo United lamin ball chang tam viau mah se awmze nei loin ball an chhuah nasa a, hei hian an attacking a tina loin an siphurh pawh an sut mai a beisei awm loh. Amaherawhchu, chawlhlawk hma hun pekbelh minute linaah ball pet thiam Mala chuan freekick a pet nawn leh a, Champhai tlangval Joseph-a’n a dang nawn tawh lo. Si khat ve ve inpe in chawlh lawk an hmang.

Chawlhlawk zawhah pawh team pahnihte an khelh dan a ngai reng a, Zo United lamin ball chang tam chhunzawmin chance hlauhawm erawh an nei thei lo. Minute 69-naah Zo United defender handball vangin Dinthar lamin penalty an hmu a, Michael-a rawn pet chhuakin goalkeeper LK Lalhmangaihzuala’n Zo United goal a venghim.

An inhnehtawk a, goal dang lut belh tawh lo tura a lan laiin Dinthar hian minute 83-naah chakna goal an khung. Substitute Steve Lalnunmawia corner pet chu Hammed chuan a tauh lut a, tun hnaia in dinthar mek Dinthar chakna goal a ni ta a ni.

Ti hian, Dinthar hian point 11 hmuin zana khel Ramhlun North nen an point a inang a, head to head-ah an chhiat zawk avangin parukna an ni mek. Zo United erawh point an hmuh belh loh avangin point sarih nen table mawngphah an chhuahsan lo.

Enge hmabak?
Zo United hian November 11-ah Aizawl FC an hmachhawn dawn a, hemi ni vek hian Dintharin Chanmari West an hmachhawn thung ang.

ZoFooty Statistics
Zo United FC 1-2 Dinthar FC
ZUFC : H. Malsawmtluanga 45’+4
DFC : Michael Lalremtluanga 20’; Balogun Hammed 83’
MoM: Balogun Hammed, Dinthar FC

54% Ball Possession 46%
10 Shots 11
2 On Target 6
2 yellow Cards 2
0 Red Cards 0
Powered by Rainbow Multibrand Mobile Showroom.

Tute nge khel?
Zo United FC: LK Lalhmangaihzuala, Lalnunpuia Pachuau, Malsawma Chhangte, Vanlalremsanga, C. Laldinmawia, H. Malsawmtluanga, Vanlalruata, Lalnunsanga, Chhanrinpianga, Malsawmdawnga, R. Lalthantluanga.
Subs: Lalvenghima, Dominic Lalruatfela, Hmingthanzauva, Rohlupuia, Vanlalhmangaiha, Isak Vanlalpeka, Lalthazuala, Jessy Laldinpuia, Lalhlimpuia.

Dinthar FC: Joseph C Lalruatfela, VL Chhanhima, Vanneihtluanga, Zothanzuala, Balogun Hammed, Saihmingthanga, Carter Ezebube Clarence, Lalbiaknia Pautu, Michael Lalremruata, Lalruatpuia, Cho Tsering Lepcha.
Subs: Isak Lalmuanpuia, Steve Lalnunmawia, Lalremtluanga, Lalbiakzuala, George MS Dawngliana, C. Lalnunsanga, Sandip Alay, Samuel Laltlanthanga, Chawngthansanga.

You May Also Like

More From Author

3Comments

Add yours

+ Leave a Comment